جرب تيجي عند نملة شايلة حتة سكر عشان توديها لعيالها وتحط انت صباعك اودامها عشان تسد عليها الطريق .. هتلاقيها جات يمين .. هتجيلها انت يمين .. هتلاقيها جات شمال
ممكن تفضلوا على الحال ده عشر ساعات لدرجة ان انت هتمل وتزهق وتستسلم وهي مش هتستسلم .. هي عندها هدف عايزة توصله رغم ان حجمها صغير جدا لكنها مصدقة نفسها وعندها ثقة في نفسها انه تقدر
الهدف : عاوزه اوصل حتة السكر لعيالي عشان ياكلوا
العقبة : بني ادم رخم حاطط صباعه في طريقي :))
النهايات المحتملة : يا اما اوصل حتة السكر .. يا اما أموت .. مفيش خيار تالت
لو جينا طبقنا الحالة دي على اي بني ادم هتلاقي للاسف عنده خيار تالت وهو (الاستسلام) لكن النمل معندوش بقى الثقافة دي معندوش غير ثقافة (الاصرار)
تحية للكائن الأكثر الهاماً في العالم رغم صغر حجمه .. (محبوبتي النملة)
أحمد ماهر
6 فبراير 2014
