و انا صغير كنت في رمضان بصوم صيام الأطفال ده اللي هو لما اجوع افطر
يعني مرة اصوم لحد الضهر و مرة اصوم لحد العصر و هكذا .. بس جيت في مرة و قررت اني خلاص هصوم صوم كامل من الفجر للمغرب زي الكبار و كده
بس كان عندي اعتقاد خاطئ ان اللي بيصوم ده فهو بيصوم عن كل حاجة حتى دخول الحمام مش بس الأكل و الشرب
فكانت النتيجة اني كنت هموت و ادخل الحمام لكن مستحمل بالعافية عشان صايم بس لما بقيت خلاص هموت روحت قولت لماما هو المغرب هيأذن امتى بقى انا هموت :)) .. فقالتلي طب ما تدخل يبني الحمام .. قولتلها لأ انا هكمل صيام .. قالتلي طب ما تكمل ايه دخل الصيام بدخول الحمام .. فطبعا لما عرفت ان ده كان اعتقاد خاطئ قعدت اضحك على الهبل اللي كان في دماغي ده
كل ما افتكر الموقف ده اعرف اهمية العلم و مقصدش بكلمة العلم هنا العلم اللي بناخده في المدرسة او الكلية بس .. لالا .. العلم مفهوم اشمل بكتير او خلينا نسميها (المعرفة) .. فمن غير العلم و المعرفة ممكن الانسان يضيع نفسه .. مش كل حاجة بتيجي بالعقل و المنطق لوحدهم لأن احيانا العقل بيقف عاجز لو عنده نقص معرفي في شيئ معين
فضروري جدااااا قبل ما تعمل اي حاجة او تدخل في اي حاجة انك تبقى متأكد انك عندك المعرفة الكافية و العلم الكافي بيها عشان ممكن تضيع وقتك و نفسك كمان
أحمد ماهر
4 فبراير 2014
