عرفت خبر ممكن يكون خبر عادي و سمعنا زيه كتير لكن معرفش ليه صدمني
واحدة صاحبة والدتي اعرفها اكتشفت انها كانت متبرعة بكليتها لابنها !!
مش عارف ليه الخبر صدمني ؟!
حسيت كأن ألم نزل على وشي
كنت دايما بسمع عن مشاعر الأمومة و مدى حب الأم لابنها (و الأب كذلك و ان كان أقل شوية) لكن كان مجرد كلام عادي بسمعه عمري ما حسيته لأني لسه مخوضتش التجربة و لسه مخلفتش فمش هعرف الأب و الأم بيحسوا بايه تجاه ولادهم
لكن الموقف ده كان كفيل انه يعرفني كويس اوي المعنى ده
عارف يعني حد يدي كليته لحد من كتر حبه فيه و ان نفسه يعيش حتى لو على حساب حياته هو
عارف يعني ايه أم تقرر انها تعيش طول عمرها بالأدوية و بالأوجاع و تعرض حياتها للخطر عشان خاطر ابنها يعيش !!
عارف يعني ايه تضحي عشان حد بحياتك (اللي هي أغلى ما تملك)
الموقف ده غير نظرتي لحاجات كتير اوووي في الحياة
حسيت بتفاهة الدنيا و مكتسباتها المادية و ان قد ايه في معاني تانية اجمل منها ميت مرة
عرفت يعني ايه انسان ممكن يحبك اكتر من نفسه ويفديك بنور عينيه
عرفت ان لما أم بتقول لابنها انه اغلى من حياتها فهي صادقة في كلامها و مش بتبالغ
عرفت يعني ايه حد ممكن يزعقلك عشان مصلحتك عشان بيحبك
عرفت ليه ربنا أنذر بعقاب شديد للانسان العاق لوالديه
بقيت أتوجع اووي لما الاقي ابن بيكنسل على أمه عشان قاعد مع صحابه و هي هتموت و تطمن عليه
بقيت بتوجع اووي لما اشوف ابن شايف خوف و قلق أمه عليها انها كده بتخنقه و فاكراه طفل صغير
بقيت مصدق كل كلمة قالتهالي والدتي في يوم من أول "مهما كبرت هفضل شايفاك العيل الصغير و هفضل اخاف عليك حتى لو بقيت متجوز و عندك عيال" لغاية "أنا أصلا عايشة عشانك" مرورا بنرفزتها لما كنت بجيب سيرة الموت و ان الواحد ممكن يموت في اي لحظة
رسالة لكل واحد عنده أم : مش هقولك اجري على امك دلوقتي و بوس ايديها و الكلام ده لأن مينفعش حد يملي عليك المفروض تعمل ايه مع الانسانة اللي بتحبك أكتر من نفسها ... لكن هقولك بس اعرف قيمة النعمة اللي في ايديك لأن في ناس كتير اتحرمت منها
أحمد ماهر
11 أكتوبر 2012
